musi Wesi

musi Wesi li musi supa. toki Inli la nimi ona li Go. jan tu li musi e musi Wesi. jan li wile sona.

jan li pali e seme?

jan wan li jo e kiwen pimeja mute. jan wan ante li jo e kiwen walo mute. supa li jo e linja mute. jan tu li pana e kiwen tawa supa. jan li musi la ona li wile jo e ma mute lon supa. jan li wile e ni la, ona li pana e kiwen mute tawa ni: kiwen ona li sike e ma ona.

jan li musi e musi Wesi lon ma seme?

musi Wesi li kama tan ma Sonko. lon ma Sonko la jan mute li musi e musi Wesi. toki Sonko la nimi ona li weiqi (圍棋 anu 围棋).

lon ma Nijon la jan mute li musi e musi Wesi. toki Nijon la nimi ona li igo (囲碁).

lon ma Anku la jan mute li musi e musi Wesi. toki Anku la nimi ona li baduk (바둑).